結婚咁耐，其實我好少喺度講我同老婆生活點
不過今日特別啲，因為係結婚一週年
為咗紀念一下，我決定親自落廚
我呢世人，只係煮過炒米粉，炒蛋，公仔麵，炒飯。
正正因為咁，先顯得我誠意
但我工作繁忙，基本上都無咩時間比我練習，更加唔想老婆睇住我練習
因為我要比個驚喜佢，連煮咩都唔肯講。
大家睇張圖，一定心諗：「咁多蛋嘅？」
無錯！我老婆係好鍾意食蛋！佢食蛋嘅次數同鍾意程度係瘋狂。
所以，我決定今日煮「全蛋宴」
其實外人睇，好似無咩特別，但對我都係一種成就解鎖同回憶。
今日放工已經好晏，同埋我都好累
本身有個邪惡想法，見老婆都唔喺到望住，不如叫外賣，等佢返嚟再扮自己煮……
但諗兩諗，都係堅持！
我第一次落街市買餸，啲阿姐見我喺出面望望望，忍唔住問我想買咩
一路行一路睇住要買啲咩
返到屋企廚房，唔係好知點開始
整整下，我先發現，我係唔識煮飯
即刻問我朋友 Jasmine，問佢點煮飯
我將啲米洗完，就問佢我要落幾多水？
點知佢話：「你個隻米應該係Jasmine rice！」
我心諗，你係咪攪緊gag呀，無啦啦講咩Jasmine rice…咩你個飯
原來佢指嘅係電飯煲入面個Jasmine rice……笑死我
而我全程拎住手機睇住Youtube跟啲Youtuber整……
其實煮嘢食真係好花心神同時間，明白母親偉大
最後我用咗個半鍾完成 三餸一湯嘅全蛋宴
本身諗住蒸水蛋…但無時間，唯有加隻蝦仁落去扮多碟餸偷雞
蕃茄蛋花湯 － 我自己覺得真心幾好飲，老婆亦盛讚，完全估唔到
韭菜炒蛋 － 咸得濟…失敗
韭菜蝦仁炒蛋 － 還可以…
豆腐炒蛋 － 賣相失敗，味道一般
呢餐食物並不是重點
但老婆似乎食得好開心，見到佢開心，我就開心了。
將來，我一定繼續煮更好味嘅煮家飯比你食
我嘅廚藝仍然有一生一世嘅時間去練習煮比你食
愛你老婆，一週年快樂
去洗碗先……
Search